100

مصر ميں ہندوستانى فلموں كى مقبوليت


ڈاکٹرولاء جمال العسیلی
(لیکچررشعبۂ اردو، عین شمس یونیورسٹی، قاہرہ، مصر)
اس حقیقت سے انکار نہیں كيا سکتا کہ ہندوستانی فلمیں اعلی مقام کی حامل ہوا کرتی ہیں ـ ہندوستانی ثقافت کی جھلکیاں ان فلموں میں بخوبی محسوس کی جا سکتی ہیں ـ ہندوستانی فلم گزشتہ دس سال کے اندر بہت سے ممالک تک پہنچ چکی ہے اور اب اس کی نمائش دنیا بھر میں 92 سے زیادہ ملکوں میں ہو رہی ہےـ
جب ہم عالم عرب کو دیکھتے ہیں تو پتہ چلتا ہے کہ یہاں ہندوستانی فلمیں بہت ہی اہم حیثیت رکھتی ہیں اور ان کا چرچا مسلسل ہوتا رہتا ہے، ان فلموں کے گانے بھی کافی مقبول ہیں_ بہت سے خلیجی ممالک میں عام طور پر ہندوستانی فلموں کی شوٹنگ كى جاتى ہے مثال کے طور پر ہندوستانی فلم “Happy new year” کی شوٹنگ دبئی میں ہوئى تھی ـ
مصر میں ہندوستانی سنيما کا ذکر کئے بغیر ہم ہندوستان کو نہیں سمجھ سكتے اور اس کے بارے میں بات کرنا مکمل نہیں سمجھا جاتا، بچپن سے ہی میرے اندر ہندوستانی فلموں کو دیکھنے کی چاہت رہى ہے، اُس وقت مصر میں یہ فلمیں صرف عید کے دنوں میں ٹی وی کے پردے پر دکھائی جاتی تھیں، اور ہم سب ایک ساتھ انھیں دیکھا کرتے تھے_ تاہم اب جب بھی مجھے ٹی وی دیکھنے کا موقع ملتا ہے تو میں صرف یہ فلمیں دیکھتی ہوں_ حالات حاضرہ اس قدر دردناک ہیں کہ میں اکثر ہندوستانی فلموں میں امید کی کرنیں دیکھتی ہوں_ کبھی کبھار فلم کا پیغام بہت متاثر کن ہوتا ہے اور میری آنکھیں نم ہوجاتی ہیں ـ
آجكل مصر میں بہت سے لوگ خاص طور پر عورتوں کو یہ فلمیں اور سلسلہ وار ڈرامے دیکھنے کی عادت پڑ گئی ہے، نئی فلموں کا انتظار کرتے ہیں اور بڑے شوق سے انہیں دیکھا جاتا ہے۔ فیس بُک پر کبھی کبھی نوجوانوں کے پوسٹ پر بھارتی فلمی ستاروں کی تصویروں کو دیکھتی ہوں _ جس سے اس بات کا اندازہ ہوتا ہے کہ مصر ميں ہندوستانی فلمی اداکار کتنے مقبول ہیں۔ ایسا کہا جاتا ہے کہ اکثر رومانٹک ہندوستانی فلموں کو دیکھ کر مصری لڑکیوں کے دلوں کی دھڑکنیں بڑھ جاتی ہیں _ یہ بھی ایک حقیقت ہے کہ ہندوستانی فلمیں ایک ملک کی نہیں بلکہ ایک تہذیب کی نمائندگی کرتی ہیں اوراس میں کوئی دو رائے نہیں ہےـ اس کی ایک اہم وجہ یہ ہے کہ اس ملک کے کسی علاقے کے بسنے والے یا کسی بھی زبان کے بولنے والے کے خیالات و تصورات واضح طور پر محسوس کیے جا سکتے ہیں ـ یہ فلمیں ہندوستانی سماج کی عکاس ہوتی ہیں،ان فلموں کو دیکھنے سے علم میں اضافہ ہوتا ہے، ان فلموں ميں جن پہاڑوں، ندیوں، مقامات اور کرداروں کو پیش کیا جاتا ہے، ان سب کا تعلق اسی سر زمین سے ہے _ گنگا اور جمنا، کرشن اور لکشمی اور ہندوستانى تہذيب بھی ہمارے لئے مانوس بن گئے ہیں ـ
سچ تو یہ ہے کہ مصر میں بیشتر لوگوں کے پاس اردو زبان کے بارے میں کوئی سابقہ پس منظر نہیں تھا، اس کے بر عکس ایک مثال ہندی زبان ہے، کیونکہ اردو زبان دوسری زبانوں کی طرح کسی خطے کی طرف منسوب نہیں ہے اس لئے بہت کم لوگ اس کو جانتے ہیں _ لیکن آج مجھے لگتا ہے کہ ہمارے یہاں میڈیا کی وجہ سے اس کا وجود ہے اور بے شمار لوگوں کو اب پتہ چلا ہے کہ اردو اور ہندی ایک ہی سکے کے دو پہلو ہیں، ان دونوں میں کوئی زیادہ فرق نہیں ہے، فرق صرف رسم الخط کاہے ۔اس لئے بیشتر ہندوستانی فلموں کے شیدائی ہى یونیورسٹیوں میں اردو ڈپارٹمنٹ میں زبان سيكھنے كے لئے داخلہ لیتے ہیں ـ
مصری لوگ ہندوستانى فلموں کے بہت شوقین ہیں_ ہندوستانی فلمیں بالخصوص تاریخی فلمیں بامقصد ہوتی ہیں_ دنیا بھر میں ان فلموں کے پیغام سے ناظرین بہت متاثر ہوتے ہیں اور موسیقی، لباس، ڈیزائن، رہن سہن اور اداکاروں کی کارکردگی وغیرہ میں دلچسپی لیتے ہیں ـ مصری لوگوں کی پسند کے مطابق اور ان کی مقبولیت اور شہرت کی وجہ سے بھارت کے معروف فنکار امیتابھ بچن نے قاہرہ فلم فیسٹیول کی دعوت پر 1991ء میں مصر کا دورہ کیا تھاـ
مصر میں ہندوستانی فلموں كی نمائش کے لئے بھارتی سفارت خانہ نے پروڈکشن کمپنیوں کے ساتھ تعاون کر کے کچھ ایسی ہندوستانی فلمیں بھی دکھائی ہیں جن میں مشہور فنکار شامل ہوتے ہیں تاکہ مصری ناظرین یہ فلمیں سینما گھروں میں دیکھ سکیں_ اور يہ بھى قابلِ ذکر ہے کہ تمام فلموں كا عربی میں ترجمہ بھى ہوتا ہے_ مشہور ہندوستانی فلمیں “چینائی ایکسپریس”، ” کریش 2″ اور “دھوم 3” كافى مقبول ہوئى ہیں- ان فلموں کی نمائش عوامی سطح پر دونوں ملکوں کے درمیان تعلقات اور زیادہ مضبوط بناتی ہے ـ میں نے مصری سینيما گھر میں “چینائی ایکسپریس” کی فلمی نمائش دیکھی تھى، اس نمائش کے دوران ميں نے كافى تعداد ميں طالب علموں اور یونیورسٹی کے نوجوانوں کو دیکھا جو بڑے شوق سے فلم كو دیکھ رہے تھے جس سے اس بات كا اندازه ہوتا ہے كہ ہندوستانی فلميں مصرى نوجوانوں ميں كافى مقبول ہیں ـ
ہميں پتہ ہے كہ مصر کے خوش گوار ماحول کے لحاظ سے ہندوستانى فلميں خاص اہمیت رکھتی ہيں اور ان میں آثار قدیمہ، سیر و تفریح اور تاریخی مقامات پائی جاتی ہیں ـ پہلی بار مصر میں 2014ء ایک ہندوستانی فلم کی بنائى گئى تھى جس کا نام “love in Cairo” تھا مصری وزارتِ سیاحت کے زیر اہتمام مصری سیاحتی مقامات اور قدرتی مناظر میں اس فلم کی شوٹنگ كى گئى تھى_ مصر كے معروف شہر قاہرہ، اسکندریہ، شمالی ساحل، غردقہ اور لکساور فلم كى شوٹنگ كے لئے كافى مقبول ہيں میرے خیال میں ايسى باتيں مصر كى سیاحت کو فروغ دينے میں مدد کرتی ہیں ـ بہت سے مصری لوگ گرمجوشی سے ہندوستانی فلموں كو دیکھا کرتے ہیں اور ہندوستانى فلموں كى مقبوليت مصر كے ديہى علاقوں ميں بھى پائی جاتی ہے، اس سے اس بات كا پتہ چلتا ہے کہ مصری لوگ بھارت سے گہری محبت رکھتے ہیں ـ پرانی نسل كے لوگ آج بھی کلاسیکی ہندوستانی فلموں اور اداکاروں کو یاد کرتے ہيں جبکہ نوجوان نسل نئی فلميں ديكھنا پسند كرتى ہے اور يہ لوگ عام طور پر فلميں بڑے شوق سے دیکھتے ہيں ـ غرض عالمی مقبوليت کے لحاظ سے ہندوستانی فلمیں اپنی روایتی حدود سے تجاوز کر گئی ہیں ـ ہندوستانى فلميں بيشتر ممالک، تہذیب اور زبانوں میں بڑی مقبولیت حاصل كر رہى ہیں اور عالم عرب کےلوگوں کو اُردو پڑھنے کا شوق ہے اس لیے ان پر ہندوستانى ڈرامہ اور سنیما کا اثر ہوتا ہے _ مصر میں بھی ہندوستانی فلموں کا چرچہ وسیع پیمانے پر ہے اور يہ دن بدن کافی مقبول ہو رہا ہے _ ان کی مقبولیت کی سب سے بڑی دلیل ان چینلز کی دستيابى ہے _ اگر یہ فلمیں قابل قبول نہ ہوتیں تو اتنے چینل کا پایا جانا بے معنی ہو جاتا، يہ سچ ہے کہ ہندوستانى فلمیں تقریبا دنیا کے مسائل سے منسلک ہوتی ہیں جو عام زندگى سے بھى قريب ہوتے ہیں اس لئے ان کی مقبولیت میں روز بروز اضافہ ہوتا جا رہا ہے اوراس كى وجہ سے اکثر لوگ ان کو اچھی طرح سمجھ سکتے ہیں کیونکہ یہ فلمیں ان کی قوت فہم کے بہت قریب ہوتی ہیں ـ

اس خبر پر اپنی رائے کا اظہار کریں

اپنا تبصرہ بھیجیں